કટારી કાળજે વાગી તમારી યાદ

કટારી કાળજે વાગી તમારી યાદ આવે છે,

રહું છું રાતભર જાગી તમારી યાદ આવે છે.

દિવસ તસ્વીર જોઊં રાતભર આવો તમે સ્વપ્ને,

મને લગની જ છે લાગી તમારી યાદ આવે છે.

કદી શું ફૂલ ને ફોરમ જુદા હો એક બીજાથી,

ચકોરે ચાંદની માગી તમારી યાદ આવે છે.

કદી સરખામણી થાયે તમારા સમ કહી દઊછું,

કિશન રાધા જ અનુરાગી તમારી યાદ આવે છે.

ઉખાડી ચાંચ ને રાખી પીવા વરસાદને ‘ચાતક’

મિટાવો પ્યાસ છે લાગી તમારી યાદ આવે છે.

વિનોદ માણેક “ચાતક”    અંજાર કચ્છ