અજાણા કેફમાં કાલે દુઆ થોડી ઘણી માગી,
કદી તારું ભવન માગ્યું, કદી તારી ગલી માગી !
તને તો ઓળખે છે મારી આંખો સાત જ્ન્મોથી,
મને થોડો પરખવા મેં હંમેશાં આરસી માગી !
નથી ખાલી જવા દેતો કદી તું કોઇ યાચકને,
કસોટી તારી કરવા આજ મેં પયગંબરી માગી !
સફળ ફેરો થયો તારા નગરમાં આજ ફાનસનો,
અજાણી ભીડમાં કોઇએ તો રોશની માગી !
કળશ કોના ઉપર ઢળશે સમય સમજી ગયો મનમાં
તમે આખું ચમન માગ્યું, ફકત મેં ગુલછડી માગી !
ઘવાયો છે અહં સૂરજનો કેવળ એ જ બીના પર
રઝળતા આદમીએ ભરબપોરે ચાંદની માગી !
સદા અર્પણ કરે પનઘટ બધાને પ્યાસનું ઓસડ
ફકત એ કારણે સાગર કને મારી નદી માગી !
ઉમળકો જાગશે અંજુમ કદી લીલા થવાનો ત્યાં,
ઘણું સારું થયું તેં કોઇની તો લાગણી માગી !
-અંજુમ ઉઝયાન્વી
Filed under: અંજુમ ઉઝયાન્વી, ગઝલ, ગીત, ગુજરાતી ગઝલ | Tagged: અંજુમ ઉઝયાન્વી, અજાણા કેફમાં કાલે દુઆ થોડી ઘણી માગી, ગઝલ, ગુજરાતી કવિતા અને ગઝલ, ગુજરાતી ગઝલ, gujarati gazal, gujaratigazal vishwa | Leave a comment »