સીમ, શેઢો, મોર, ટહુકો ને પછી શું શું ગયું ?

સીમ, શેઢો, મોર, ટહુકો ને પછી શું શું ગયું ?
ઘર, ગલી, સરિયામ રસ્તો ને પછી શું શું ગયું ?

ટેરવે થીજી ગયેલી છે પળો કૈં બર્ફ થૈ –
તાપ, સગડી, સૂર્ય, તડકો ને પછી શું શું ગયું ?

તરફડે છે એક પીંછુ જોઇને આ આભને,
ઝાડ, જંગલ, પાંખ, માળો ને પછી શું શું ગયું ?

પ્રેત જેવી શૂન્યતા ધૂણે હવે ખંડેરમાં-
શબ્દ, અર્થો, મૌન, પડઘો ને પછી શું શું ગયું ?

આટલામાં ક્યાંક મારા દિવસો વસતા હતા-
તોરણો, છત, બારી, પરદો ને પછી શું શું ગયું ?

– આહમદ મકરાણી